୧୦ ଦଫା ଦାବି ପୂରଣ ପାଇଁ ଅମଲା ସଂଘର କାର୍ଯ୍ୟବନ୍ଦ ଆନ୍ଦୋଳନ ।

୧୦ ଦଫା ଦାବି ନେଇ ଓଡ଼ିଶା ରାଜସ୍ୱ ଅମଲା ସଂଘର ଆନ୍ଦୋଳନ କରୁଥିବାବେଳେ ଅନୁଗୋଳ ଶାଖା ପକ୍ଷରୁ ମଧ୍ୟ ଆନ୍ଦୋଳନ ଆରମ୍ଭ ହୋଇଛି ।ଅମଲାଗଣ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ସମୂହ ଛୁଟିରେ ରହିଥିବାରୁ ଜନସାଧାରଣ ଅନେକ ଅସୁବିଧାର ସମ୍ମୁଖୀନ ହେବାର ଆଶଙ୍କା ଉପୁଜିଛି । ଅମଲାମାନେ ସମୂହ ଛୁଟି ନେଇ ଆନ୍ଦୋଳନ ଚଳାଇଛନ୍ତି।

ରାଜ୍ୟ ମିଳିତ ଅମଲା ମଞ୍ଚର ନିଷ୍ପତ୍ତି କ୍ରମେ ଅମଲାମାନେ ଧାରଣା ଦେଇଛନ୍ତି। ସର୍ବନିମ୍ନ ଶିକ୍ଷାଗତ ଯୋଗ୍ୟତା ସ୍ନାତକ ଓ କମ୍ପ୍ୟୁଟର୍ ଦକ୍ଷତା ଥିବା ଓଡ଼ିଶାର ସମସ୍ତ ଅମଲାମାନଙ୍କର ଗ୍ରେଡ ପେ (ଲେଭେଲ-୯)କୁ ବୃଦ୍ଧି କରିବା ପାଇଁ ରାଜ୍ୟ ଅମଲା ସଂଘ ଅନେକ ଦିନ ହେଲା ଦାବି କରି ଆସୁଛି। ଦାବି ପୂରଣ ନହେବାରୁ ଅମଲାମାନେ ଆନ୍ଦୋଳନକୁ ଓହ୍ଲାଇଛନ୍ତି।

ପୂର୍ବରୁ ଦାବି ନେଇ ବିଭିନ୍ନ ସମୟରେ ସରକାରଙ୍କ ସହ ଓଡ଼ିଶା ରାଜସ୍ୱ ଅମଲା ସଂଘର ପ୍ରତିନିଧି ମଣ୍ଡଳୀର ଆଲୋଚନା ହୋଇଥିଲେ ମଧ୍ୟ କୌଣସି ସୁଫଳ ମିଳିପାରିନାହିଁ । ଯେପର୍ଯ୍ୟନ୍ତ ରାଜ୍ୟ ସରକାର ସେମାନଙ୍କ ଦାବି ପୂରଣ କରି ନାହାଁନ୍ତି ସେମାନଙ୍କ ଆନ୍ଦୋଳନ ଜାରି ରହିବ ବୋଲି ଆନ୍ଦୋଳନରତ ଅମଲାମାନେ ସୂଚନା ଦେଇଛନ୍ତି ।